Урачыстае закрыццё фестывалю «Славянскі базар» пройдзе 19 ліпеня ў Віцебску
Фота з архіва 19 ліпеня, Віцебск . На ўрачыстым закрыцці XXXV Міжнароднага фестывалю мастацтваў «Славянскі базар у Віцебску» вырашыцца галоўная інтрыга конкурсу выканаўцаў эстраднай песні. Якія яшчэ мерапрыемствы сёння чакаюць жыхароў і гасцей абласнога цэнтра, расказалі ў дырэкцыі фестывалю.
У 20.30 пройдзе ўрачыстае закрыццё фестывалю, на гала-канцэрце ў Летнім амфітэатры выступяць удзельнікі XXXV Міжнароднага конкурсу выканаўцаў эстраднай песні «Віцебск». Прэтэндэнты выканаюць славянскі хіт у суправаджэнні Прэзідэнцкага аркестра. Другі тур дапаможа выявіць пераможцу і вырашыць інтрыгу першага конкурснага дня, у якім аднолькавыя балы атрымалі прадстаўніцы Казахстана і Італіі.
З сольнымі канцэртамі ў 14.00 выступяць зоркі расійскай эстрады: у канцэртнай зале «Віцебск» гледачы пачуюць Аляксандра Малініна, а ў абласной філармоніі — Дзмітрыя Малікава. У 20.00 у КЗ «Віцебск» пройдзе сольнік Ірыны Круг.
Завершыцца і «Лялечны квартал». У 11.00 і 13.00 спектакль «Казкі Паднябеснай» прадставіць Белгарадскі тэатр лялек, а фінальным спектаклем будзе пастаноўка Беларускага тэатра «Лялька» ў 19.00. Віцебскія лялечнікі пакажуць «Лялькі Ціма Талера, або Прададзены смех».
З 12.00 на плошчы Перамогі будуць праходзіць мерапрыемствы ў рамках рэспубліканскай акцыі МУС «За бяспеку — разам!». Тут разыграюць каштоўныя прызы, адзін з якіх — горны веласіпед.
У кінапраграме фестывалю гледачоў чакае анімацыйны фільм «Песня Сірын», які можна паглядзець у «Доме кіно» ў 12.00.
У комплексе культурна-масавага адпачынку імя Савецкай арміі пройдзе фестываль фарбаў «Белхолі», з 14.00 там чакаюць аматараў яркага шоу.
У 14.30 на спортпляцоўцы каля Летняга амфітэатра адбудуцца спаборніцтвы па сілавым экстрыме «Славянскі дух».
У Нацыянальным акадэмічным драмтэатры імя Якуба Коласа ў 18.00 публіцы прадставяць спектакль «Мамачка» Дзяржаўнага драмтэатра на Васільеўскім з Санкт-Пецярбурга.
