Больш як 10 тыс. удзельнікаў штогод. Адкрыты прыём заявак на конкурс «Творчасць без межаў»
Фота НЦМТДМ 23 ліпеня, Мінск . У Нацыянальным цэнтры мастацкай творчасці дзяцей і моладзі (НЦМТДМ) стартаваў прыём заявак на новы сезон міжнароднага фестывалю-конкурсу «Творчасць без межаў». Аб гэтым паведамілі ва ўстанове.
Прыём заявак стартаваў анлайн, палажэнне размешчана на сайце НЦМТДМ. Чакаецца вялікая колькасць удзельнікаў у вакальным, харэаграфічным і інструментальным жанрах, адзначылі арганізатары.
«Творчасць без межаў» — упадабаны ўжо конкурс, які праходзіць штогод у дні асенніх канікулаў, у гэтым годзе — з 2 па 6 лістапада. Ён праводзіцца для стварэння магчымасці ўзаемадзеяння, выяўлення новых талентаў, падтрымкі і развіцця творчых калектываў і індывідуальных выканаўцаў. Сустрэча культур — гэта заўсёды вялікая падзея для дзяцей, а ўзаемадзеянне з прадстаўнікамі розных краін дорыць унікальны эмацыянальны вопыт, пашырае гарызонты і напаўняе жыццё яркімі фарбамі.
Ідэя стварэння конкурсу ўзнікла з мары, каб дзеці з розных краін маглі сустрэцца, пасябраваць і пагаварыць на адной мове — мове творчасці. Традыцыйна заяўкі на яго падаюць больш як 10 тыс. удзельнікаў ва ўзросце ад 6 да 25 гадоў з розных краін і ўсіх рэгіёнаў Беларусі. У другі этап праходзіць каля 200 творчых нумароў. У мінулым годзе далучаліся ўдзельнікі з Азербайджана, Казахстана, расійскіх Курска, Санкт-Пецярбурга, Уфы, Петразаводска, Іашкар-Алы, Сыктыўкара. А за час правядзення праекта на яго сцэну выходзілі выканаўцы і калектывы з Малдовы, Казахстана, Кыргызстана, Узбекістана, Грузіі. У вочны этап прайшлі каля 2,5 тыс. таленавітых удзельнікаў.
Праграма ўключае творчыя выпрабаванні, майстар-класы, сустрэчы, этнадыскатэку, экскурсіі. На варце прафесійнага ўзроўню мерапрыемства стаяць эксперты ў галіне адукацыі і мастацтва, якія прадстаўляюць як нашу краіну, так і сусветную супольнасць, і іх галоўная місія — аб’ектыўная ацэнка талентаў. Аднак роля журы выходзіць далёка за рамкі падліку ачкоў: яны становяцца маякамі для моладзі і задаюць найвышэйшую планку, натхняюць.
«Фестываль можна па праву лічыць адной з самых прыкметных і значных падзей нашай краіны. Для многіх удзельнікаў гэта важны этап у іх творчым жыцці і стымул да пакарэння новых вяршынь», — падкрэслілі ў цэнтры.
Некалькі гадоў таму ў асобны конкурс «Творчасці без межаў» вылучылася «Тэатральная творчасць», у будучым ён пройдзе ў час вясенніх канікулаў. Яго ўдзельнікамі становяцца чытальнікі, тэатральныя і лялечныя калектывы, навучэнцы тэатра моды. Сёння тэатральная намінацыя — самастойная, магутная галіна фестывалю, дзе нараджаюцца новыя сэнсы, адкрываюцца юныя чытальнікі, акцёры, рэжысёры.
Прыём заявак прадоўжыцца па 25 верасня. 
Фота НЦМТДМ
